بلدى .........طنطا .....وأحب اعيش أونطه

هاى

من يومين كده خير الله ما اجعلوا خير كنت قاعده مع الحاجه امى ربنا يخليها ليا وتفضل كده هبالنى

المهم يا جماعه

الحاجه قاعده وعندها برد شديد ولاقتها بتقول

سيكو ميكنش عندى انفلونزا طيور

رديت وقلت

والله يا امى حسب الحاله لو جالك انتفاش فى الريش مع هبل شديد تبقى هى

امى : وده اعرفه ازاى

قعدت مربعه وعملت نفسى كحكيم الصحه وقلت

سيكو تتحدث : ماما قولى ولا تخبى ايه علاقتك بالفراخ اليومين دول

ماما وهى مستغربه : عادى يعنى ايه

سيكو : يعنى اخر مرة بوستى فرخه امتى

ماما : قومى من هنا يا سيكو لاضربك

سيكو : انتى حره كنت هعالجك

قمت يا اخونا وماما وانا ماشيه قالت ماتيجى نسافر البلد يا سيكو

لاقيتنى صراخت وقلت انا ابدا ابدا انا اخر مرة برستيجى ضاع وكله ضاع

امى انتى لسه فاكره انتى قلبك اسود

اصل يا جماعه من اربع سنبن كده نزلت انا وماما البلد فى الاجازه كنت لسه متخرجه وكانت اجازة الصيف وماما عاوزة تشوف اخواتها اللى كلهم فى البلد ما عادا هى

المهم سافرت معاها وقلت عادى

هناك بقى اول ما وصلت هى بلد فلاحين خالص وانا بروح كل سنه اتمتع بالطبيعه والبلد والهواء كل حاجه مختلفه حاجه كده نقيه

احنا يا اخونا عندنا دار كبيره قوى مبنى حديث مكون من ست طوابق والتانى دور واحد وهو الدوار وخلفهم حظيرة المواشى والفرن وترومبيت الميه وكل ده داخل صور مجمع الكل وليهم بوابه كبيره

المهم يا شباب دخلت واول ما دخلت لقيت هجوم كاسح ارض جو

نسيت اقول ليكوا انا عندى سبع خالان غير خالتين غير اللى توافهم الله اصل جدتى ست ولا كل الستات ارنبه

وجدى رجل ولا كل الرجال يعنى اخوات امى بالظبط 11 نفر

دول من غير الاطفال

اه اكمل ليكوا او ما دخلت وبما انى اكبر بنت هناك لان امى اول واحده اتجوزت وخلفت لقيت حواليا بالظبط 30 طفل بسم الله ما شاء الله

قعدت اعد فيهم وسبت امى وخالانى ووقفتهم صف وقلت كجنرال فى معركه

صفوف بقى يا حبيبى انت وهو وهى وكل واحد يقولى بالظبط هو ابن مين واتولد امتى والساعه كام بالظبط

العيال طبعا افتكرونى هبله لكن محدش قدر يتحرك من مكانه بدون اذن كنت هاكلوا

هما اعمرهم كده تتراوح مابين لسه مولود وحتى الجامعه يعنى باختصار كل مراحل التعليم سنه بسنه

المهم خالى جه وقالى ايه يا سيكو انتى بتقرى على العيال

قلت له حاش لله يا خالى بس قولى هو انتوا كنت داخلين المارثوان

ولا فى تار ما بينكم ولا ايه ده اقل نفر عنده تلاته

قالى الله اكبر يا سيكو

لا يا خالى انا مش بحسد انا بس بسال طب بتوكليهم ازاى طب بلاش بتعرفوهم من بعض ده انا تهت ونسيت انا بنت مين

خالى قالى سيبك من كل ده تيجى معايا

سيكو : فين يا خالى

خالى : الغيط ( الحقل يعنى )

سيكو " يا ريت انا نفسى اشوف الارض واهو بالمره نعرف ارضنا فين

خالى يا جماعه دخل وجاب البقره والحمار

عادى جدا اللى مش عادى ان كان ساعتها منتشر جنون البقر وانا كنت قلقانه من البقره لانها اول ما شافتنى واضح انها كرهتنى وبدات تبص ليا وتقول عااااااااااااااااااااااااااااااااااااااااااااااااع

انا خفت وسالت خالى قالى لا عادى يا سيكو متخفيش دى مستغرباكى بس

قلت طيب هنعمل ايه

قالى اركبى انتى الحمار ده وانا هاخد البقرة

سالت خالى وده يمشى ازاى

قالى : يعنى ايه

سيكو : يعنى مانوال ولا اتومتك

يعنى فين الدبارياج والفرامل والبنزين اسوقه ازاى

خالى : اركبى انتى وهو عارف الطريق

سيكو: يعنى هو متبرمج يعنى اتومومتك

خالى : يعنى ايه

قلت له ولا حاجه خلاص

المهم يا شباب خرج خالى بالبقرة اللى كرهانى وانا بقى قلت هيييييييييييييييييييييييييييه هركب الحمار وعملت نفسى ابو زيد الهلالى عليه وقعدت اجرى بيه

المهم شويه والبقرة وخالى قدامى وانا والحمار ورا

لكن وخد بالك من لكن

كل شويه البقره تدير ليا وتقول عااااااااااااااااااااااااااااااااااع وعنيها بطق شرار

سيكو: خالوا الحقنى

خالى : مالك فى ايه

سيكو : البقره عاوزة تضربنى

خالى : لالالالالالالا متهايلك هى مستغرباكى بس

لكن يا اخونا كل شويه البقره تلف وتقول عااااااااااااااااااااااااااااااااااااااااااع وعنيها بطق شرار

ولا كانى مرات ابوها او كلت حد من عليتها او الله اعلم هى فاهمنى غلط

سيكو : خالى هو انتوا عندكم جنون بقر

خالى : اه ظهر كام حاله كده

قلت قشطه يبقى البقره دى مجنونه

المهم

شويه وانا حطه عينى عليها وخايفه منها موت وحركه مفاجئه منها لفت 180 درجه وشدت اللجام من ايد خالى وانا بسرعه البرق ناطيت من على الحمار

وطلعت اجرى وهى ورايا وانا اجرى وهى ورايا

وخالى ورايا ميت من الضحك واستخبيت منها والفلاحين مسكوها ورجعوها لخالى

ورجعت لخالى وقلت ابدا مامشيش انا وهى فى طريق وواضح انها هديت شويه وكانها كانت بتضحك من جواها عليا وباصا ليا وميته من الضحك

خالى يعنى ايه

يعنى انت هتاخد المحور وانا الدائرى

خالى قالى ماشى اركبى الحمار وهو هيوصلك للغيط

قلت ماشى مش هو متبرمج

خالى قالى اه

المهم ركبت ومشيت شويه واحنا بقى على طريق الترعه قابلت خالى ناصر اللى قال سيكو عرفتى تركبى الحمار

سيكو ايوه يا خالى

خالى ناصر : راحه فين

سيكو : معرفش بس ممكن تسال الحمار خالى بيقول متبرمج

خالى : طيب بس اوعى ينزلك الترعه

سيكو : ربنا يستر

المهم مفيش دقيقه وواضح ان الحمار معجبوش الكلام وهوب لاقيتوا متجه للترعه ودلقنى هناك زى كوم الزباله وخالى ناصر واقف ميت من الضحك

سيكو : كده يا خالى انبسطت

خالى : معلش يا سيكو وركبنى تانى الحمار ومفيش لقيت الحمار اللى واضح انه طلع احول فى الاخر ودخل فى راجل عجوز

الراجل : انتى حماره

سيكو : لا سيادتك ده هو

الراجل وخد باله من اللهجه انى من القاهره : هو مين

سيكو : هو الحمار مش انا

الراجل : مش انتى اللى سايقه

سيكو : ابدا والله هو اللى متبرمج

جه خالى جرى واعتذر للحج وقالوا معلش دى بنت كذا وغريبه ومش عارفه حاجه

لقيت الراجل بص ليا باستغراب وقال لا حول ولا قوة الا بالله

المهم الحمار عقل وودانى فى الاخر الغيط وجه بعد كده خالى والبقره المجنونه

وقلت فى سرى وانا بصه ليه اانتى مجنونه

لقيتها كانها قرات افكارى وقالت ععععععععععععععععععععععععععععععععععععععااااااااااع

قلت خالى انا عاوزة اروح لامى عااااااااااااااااااااااااااااااااااااع

قالى خلاص يا سيكو هى هديت

قلت طب ما تديها مهدا انا عندى خبره ومعايا قالى لا هى هتعقل لوحدها قلت طيب

شويه كده خالى خدنى وقعد يعلمنى ازاى اقطع درة وقعدنا وهزرانا وعادى ونسيت

لكن شويه كده قالى تعالى يا سيكو حطى الاكل للبقره

قلت لا دى مجنونه هتاكلنى انا لالالالالالالالالالا

خالى متخفيش حطى الاكل علشان تحبك

وانا بكل هبل خدت الاكل ولسه هقرب منها لقيتها بصت ليا حته دين بصه وقالت عااااااااااااااااااااااع وقطعت اللجام من الارض وجريت ورايا

انا بقه رميت الاكل قلت يمكن هى عاوزة الاكل

ابدا لاقتها سابت الاكل وورايا وانا اجرى وهى ورايا مصصمه على ايه معرفش

المهم خالى جرى ورانا وكان المنظر كالاتى

انا بجرى والبقره ورايا وخالى ورانا احنا الاتنين

المهم خالى حصلها ومسكها وقالى خلاص هى بقيت كويسه

سيكو: كويسه مين انا عاوزة امى البقره دى منطهدانى وانت مسلطها عليا هى بقره ولا كلب

خالى خلاص هنروح

شويه وخالى جاب البرسيم للحيوانات فى الدار وحطه على الحمار وقال اركبى

قلت له لا كفايه عليه الحمل

قالى متخفيش هو خفبف والحمار متعود على كده

المهم ركبت وظبط توازن

واذ بواحد جارنا فى الارض قال

يا حلاوه يا حلاوة دى عرفت تركب الحمار

والله ما كمل كنت انا على الارض وفوقى البرسيم وفوقنا الحمار وخالى ساب كل ده ووقع من الضحك على الارض

وقالى اتحسدتى يا بيضه

قلت له لا بيضه ولا فرخه قومنى

قومت وقالى تعالى اركبى

قلت اركب ايه ما كفايه كده انا برستبجى ضاع خااااااااااااااااااااالص انا راجعه

قالى عارفه الدار

قلت له دار مين انا هرجع مصر مشى انا خلاص مليش قاعده فى البلد دى

وده اللى حصل يا ساده يا كرام تفتكروا انا اقدر اروح البلد تانى

ابد نفر نفر نفر

بقى اروح اقع فى بقره مجنونه وحمار حصاوى احول

فينك يا وزتى